Miðvikudaginn 29. mars verður næsti veffundur ESCN um bindiefni og steypu næsta áratugar. Fundarstjóri verður Børge Johannes Wigum, formaður Steinsteypufélagsins. 

ECSN er net evrópskra steinsteypufélaga sem samanstendur af 13 félögum. Á þessum fundi kynna helstu sérfræðingar innan ECSN dæmi frá ýmsum Evrópulöndum um hvernig byggingageirinn getur dregið úr áhrifum steypu á loftslag.
Þetta er annar fundurinn sem ECSN hefur skipulagt á sviði sjálfbærrar steinsteypu og var sá fyrri haldinn 25. nóvember 2021 um efnið „Steypa og sjálfbærni – uppfærsla á áframhaldandi viðleitni í Evrópu“.

Hér má finna nánari upplýsingar um þennan fund og skráning er  hér. Fundurinn hefst kl 10.30 að íslenskum tíma.

Steinsteypuverðlaunin voru afhent við hátíðlega athöfn á Steinsteypudeginum. Að þessu sinni voru það Vök Baths, náttúrbaðstaður við Urriðavatn, sem hlutu verðlaunin. Sjá nánar undir flipanum Steinsteypuverðlaun. 

Að þessu sinni bárust félaginu átta tilnefningar, sjá hér að neðan og stutta umfjöllun í Sigmáli, fréttabréfi félagsins. 
​

Steinsteypudagurinn 2023 var haldinn föstudaginn 10. febrúar s.l. á Grand hótel. Að venju var dagurinn fjölsóttur en um 100 manns voru skráðir.

Erindi voru fjölbreytt, afar fróðleg og vel flutt. Er öllum þeim sem gáfu sér tíma til að flytja erindi þakkað kærlega fyrir þeirra innlegg en án þeirra væri ekki mögulegt að bjóða upp á Steinsteypudaginn.

Að þessu sinni var ákveðið að sleppa spurningum strax að afloknum erindum en bjóða þess í stað upp á pallborðsumræður eftir hverja sessjón. Gafst það fyrirkomulag vel og umræður voru líflegar. Þar til viðbótar var boðið upp á umræður um vistvæna framtíð, þær hindranir sem bransinn upplifir á vegferðinni að vistvænni steypu og hvernig við getum leyst þær. Þar var margt gagnlegt sem kom fram en HMS hyggst, í samvinnu við Steinsteypufélagið, vinna fræðsluefni vegna nýlegra breytinga á byggingarreglugerð um vistvænar lausnir í steypu.

Nemendaviðurkenningar voru veittar og Steinsteypuverðlaunin 2023 voru afhent.
​
Að formlegri dagskrá lokinni voru léttar veitingar í boði Sementsverksmiðjunnar og Aalborg Portland.