Sæl öllsömul,
við þökkum ykkur öllum kærlega fyrir þátttökuna á Steinsteypudegi 2010. Í meðfylgjandi skjali eru allir fyrirlestrar sem fluttir voru á ráðstefnunni.
Enn vantar okkur þó tvo fyrirlestra en vonandi náum við að bæta úr því sem fyrst.
Þrátt fyrir kreppuástand mættu á annað hundrað manns á Steinsteypudag 2009. Dagskráin var byggð upp á svipaðan hátt og 2008, sambland af rannsóknum, hönnun, arkitektúr og framkvæmdum.
Gerðar voru nokkrar breytingar til að koma til móts við sem flesta, boðið upp á kreppuaðgangseyri þar sem hægt var að fá lægra verð með því að sleppa sumum hlutum dagsins. Góður rómur var gerður að þeim fínu fyrirlestrum sem haldnir voru. Erlendir fyrirlesarar voru 4 og fjölluðu um arkitektúr, brunavarnir í jarðgöngum, styrkingu gamallar steypu og Héðinsfjarðargöng. Og íslensku fyrirlesararnir stóðu sig einnig vel með sitt fjölbreytta efni.
Að þessu sinni voru 3 aðilar með bása á Steinsteypudeginum NMÍ, BM Vallá og Mannvit. EE
Steinsteypudaginn 2008 sem haldinn var 22.febrúar var með nokkru öðru sniði en undanfarin ár því dagskráin var mun fjölbreyttari og höfðaði til fleiri. Dagskránni var einnig skipt niður í þemu þannig að auðveldara væri fyrir fólk að sækja afmarkaða hluta dagsins. Þetta virðist hafa hrifið því metaðsókn var á ráðstefnuna um 160 manns.
Stærsti viðburður Steinsteypufélagsins er hinn árlegi Steinsteypudagur og var hann haldinn 16. febrúar 2007 á Grand Hótel í Reykjavík. Að þessu sinni var ákveðið að hafa líftíma mannvirkja sem þema á Steinsteypudeginum og voru nokkur erindi flutt sem beint og óbeint fjölluðu um atriði sem snerta líftíma mannvirkja.
»» meiraSteinsteypufélagið stendur 17. febrúar næstkomandi, í tuttugasta sinn fyrir Steinsteypudegi. Á ráðstefnunni, sem er opin öllu áhugafólki um steinsteypu, eru gjarnan kynntar nýjustu rannsóknir á sviði steinsteypu, sagt frá áhugaverðum nýjungum og fjallað um það sem er efst á baugi hverju sinni. Ekkert hefur verið til sparað til að gera ráðstefnuna sem áhugaverðasta á þessum tímamótum og verða 14 erindi flutt að þessu sinni, en aldrei fyrr hafa verið flutt svo mörg erindi. Það er því af nógu að taka og flestir ættu að geta fundið þar áhugaverð erindi.
Ráðstefnan verður haldin á Grand Hótel Reykjavík, föstudaginn 17. febrúar næstkomandi. Þátttökugjald er 18.000 krónur og er innifalið í því:
Ráðstefnugögn, fjölrituð í möppu
Hádegisverður og kaffiveitingar
Veitingar í lok Steinsteypudags
Hægt er að tilkynna þátttöku strax, með því að senda tilkynningu í tölvupósti til steinsteypufelag@steinsteypufelag.is . Vinsamlegast skráið ykkur sem fyrst en skráning stendur til miðvikudags 15. febrúar
»» meiraFöstudagur 18. febrúar 2005 á Grand Hótel Reykjavík
Dagskrá:
08.30–09.00 Skráning og afhending gagna
09.00–09.10 Setning Steinsteypudags
Haukur J. Eiríksson, formaður Steinsteypufélagsins
09.10–09.35 Steypa í skriðmótum
Jón S. Möller, verkfræðingur hjá ÍSTAK hf.
Steinsteypufélagið stendur nú í átjánda sinn fyrir Steinsteypudegi. Á ráðstefnunni, sem er opin öllu áhugafólki um steinsteypu, eru gjarnan kynntar nýjustu rannsóknir á sviði steinsteypu, sagt frá áhugaverðum nýjungum og fjallað um það sem er efst á baugi hverju sinni. Dagskráin er að venju fjölbreytt en flutt verða 11 erindi sem koma víða að.
Ráðstefnan verður haldin á Grand Hótel Reykjavík, föstudaginn 20. febrúar næstkomandi. Þátttökugjald er 15.000 krónur og er innifalið í því:
• Ráðstefnugögn, fjölrituð í möppu
• Hádegisverður og kaffiveitingar
• Veitingar í lok Steinsteypudags
Hægt er að tilkynna þátttöku strax, með því að senda tilkynningu í tölvupósti til steinsteypufelag@steinsteypufelag.is Einnig má hringja í síma 860 5044 eða senda tilkynningu í myndsendi 585 5041.
»» meiraRáðstefnan verður haldin á Grand Hótel Reykjavík, föstudaginn 21. febrúar næstkomandi. Þátttökugjald er 14.000 krónur og er innifalið í því:
· Ráðstefnugögn, fjölrituð í möppu
· Hádegisverður og kaffiveitingar
· Veitingar í lok Steinsteypudags
Hægt er að tilkynna þátttöku strax, með því að senda tilkynningu í tölvupósti til steinsteypufelag@steinsteypufelag.is Einnig má hringja í síma 860 5044 eða senda tilkynningu í myndsendi 585 5041.
»» meiraEfni á Steinsteypudegi 2002
1. Steinsteypa á Íslandi í yfir 100 ár - þróun og staðan í dag.
Hákon Ólafsson, forstjóri Rb
Steinsteypa í dag er annað efni en steinsteypa fyrir 100 árum. Farið verður yfir helstu breytingar, þær skýrðar og fjallað um þá þróun, sem á sér stað í steinsteyputækni í dag.
2. Um Evrópustaðla og um þróun upplýsinga- og hátæknilausna til prófana á steinefnum.
Þorgeir S. Helgason, Bergspá ehf. - Petromodel
Fjallað verður um nýju samevrópsku prófunar- og framleiðslustaðlana fyrir steinefni og niðurstöður prófana bornar saman við eldri niðurstöður. Kynntur verður hugbúnaður sem má nota til að áætla ýmsa tæknieiginleika steinefna og fyrstu niðurstöður úr gagnabanka um eiginleika og landfræðilega dreifingu íslenskra steinefna birtar. Loks verður rædd þróun mælitækis til sjálfvirkrar greiningar á grunneiginleikum steinefna
3. Er steinsteypa alltaf góð í bruna?
Guðmundur Gunnarsson yfirverkfræðingur Brunamálastofnun
Áratuga reynsla er fyrir því að steinsteyptir byggingahlutar standa sig vel í bruna og sjaldgæft er að staðsteypt hús hrynji í eldsvoðum. Steyptar einingar sýna þó annarskonar hegðun. Hönnuðir taka oft brunamótstöðu steinsteypuvirkja sem gefna. Tilraunir sem gerðar hafa verið á nýjum steypugerðum benda til þess að þær séu viðkvæmari en eldri gerðir. Hvaða hitaáraun verður steypan fyrir í eldsvoðum og hvaða áhrif hefur hiti á steypt burðarvirki. Möguleg eldvörn á steinsteypu. Hönnunarforsendur. Dæmi um steypt burðarvirki eftir bruna.
4. Kárahnjúkavirkjun
Pétur Ingólfsson, verkfræðingur hjá Landsvirkjun
Áformað að er virkja Jökulsá á Dal og Jökulsá í Fljótsdal í einni virkjun, sk. Kárahnjúkavirkjun, til að útvega fyrirhuguðu álveri Reyðaráls raforku. Uppsett afl verður um 750 Megawött og áætluð orkuvinnslu um 4.600 Gígawattstundir á ári. Kárahnjúkavirkjun verður þar með langstærsta virkjun sem Íslendingar hafa ráðist í. Framkvæmdirnar verða meiri og stærri í sniðum en hér hefur áður þekkst. Greint verður frá tilhögun virkjunarinnar, áhrifum hennar á nánasta umhverfi og fyrirséðum framkvæmdaáætlunum, m.a. við 190 m háa stíflu og 40 km af jarðgöngum
5. Álver í Reyðarfirði
Eyjólfur Árni Rafnsson, verkfræðingur, Hönnun hf
Farið verður yfir verkefnið, umfang þess, stærð helstu mannvirkja, helstu magntölur og kostnaðarliði. Einnig verður fjallað um þann hluta verkefnisins sem að baki er, þ.e. mat á umhverfisáhrifum og megin niðurstöður þar.
6. Kynning á alþjóðlegri ráðstefnu um sjálfútleggjandi steinsteypu.
Dr. Ólafur Wallevik verkfræðingur hjá Rb
Víða um heim hefur framleiðsla á sjálfútleggjandi steinsteypu náð fótfestu vegna þess að sú mikla gæðaaukning á efniseiginleikum sjálfútleggjandi steinsteypu, bæði í fersku og hörðnuðu ástandi, er eftirsótt. Kostir sjálfútleggjandi steinsteypu eru ótvíræðir, en þó verður notkun hennar að haldast í hendur við aukningu þekkingar á öllum stigum mannvirkjagerðar. Þegar hafa verið haldnar tvær alþjóðlegar ráðstefnur um sjálfútleggjandi steinsteypu, í Japan (þar var sjálfútleggjandi steinsteypa fyrst skilgreind) og í Svíþjóð (þar hefur hún náð mestri fótfestu). Íslandi hefur hlotnast sá heiður að halda þriðju alþjóðaráðstefnuna og mun Dr. Ólafur Haraldsson Wallevik kynna skipulag hennar stuttlega, ásamt því að greina frá "keynote lectures".
7. Composites in civil engineering - and in particular for rehabilitation of structures
Prófessor Björn Täljsten hjá Luleå University of Technology
This paper discuss briefly the use of composites in Civil Engineering with a focus on strengthening and rehabilitation. In particular, a full-scale test on an overhead crane beam is presented. The result from this test shows that it is fully possibly to change the static system of a structure by strengthening it with CFRP (Carbon Fibre Reinforced Polymer) sheets.
Also the use of non-metallic reinforcement in RC and PC structures are discussed.
8. Skriðeiginleikar steinsteypu með íslenskum efnum
Guðni Jónsson, verkfræðingur hjá Rb
Skrið í steinsteypu er fyrirbæri sem ekki hefur verið rannsakað hér á landi, en töluvert erlendis undanfarin ár. Þessi eiginleiki steinsteypunnar að skríða undan álagi getur valdið mjög miklum skaða ef ekkert er hugað að við hönnun mannvirkja.
Í byrjun árs 2001 var farið í gang með þriggja ára verkefni hjá Rannsóknastofnun byggingariðnaðarins þar sem skrið er rannsakað í steinsteypu, sérstaklega eru áhrif íslenskra fylliefna á skrið skoðuð.
9. Jarðskjálftaþol skúfveggja úr járnbentri steinsteypu
Bjarni Bessason, dósent við verkfræðideild Háskóla Íslands
Um það bil 60% af íbúðarhúsnæði á Suðurland eru einna til tveggja hæða steinsteyptar byggingar. Í Suðurlandsskjálftunum 2000 varð umtalsvert tjón á byggingum á svæðinu, sérstaklega í lítið járnbentum eldri húsum. Í fyrirlestrinum verður fjallað um burðarþol steinsteyptra skúfveggja með mismunandi járnabendingu. Ennfremur verður fjallað um jarðskjálftaþol dæmigerðar íbúðarbyggingar með annars vegar lítið og hins vegar mikið járnbenta útveggi. Stuðst verður við mæld jarðskjálftaáhrif frá Suðurlandsskjálftunum 2000.
10. Innri strúktúr steinsteypu kannaður án sýnatöku
Dr. Gísli Guðmundsson, verkfræðingur hjá Rb
Undanfarin ár hefur Rb tekið þátt í samnorrænu verkefni sem fjallar um hagnýtar mæliaðferðir við ástandsmat á steinsteypu, án þess að taka sýni af steypunni (e. Non Destructive Measurements on Concrete). Flestar þessara aðferða eru velþekktar úr öðrum sviðum, eins og t.d. jarðeðlisfræði. Verkefnið er styrkt af Norræna Iðnaðarsjóðnum (Nordisk Industry Fund), Íbúðalánasjóði og Steinsteypunefnd. Markmið verkefnisins er annars vegar að geta ákvarðað ástand steinsteypu sem er allt að um 2 meter á þykkt; og hins vegar að finna og kanna ástand bendistáls og for/eftir- spennivíra (pre-/post-stressing cables). Helstu aðferðir sem hafa verið kannaðar eru: Radarmælingar, hljóðbylgjumælingar, s.k. SASW-mælingar og geislamælingar (betatron). Engum af þessum aðferðum hefur verið beitt hér á landi á steinsteypu. Við jarðeðlisfræðilegar rannsóknir hafa svipaðar aðferðir verið notaðar Sem dæmi má nefna íssjánna sem notuð er af Raunvísindastofnun við að finna þykkt jökla og til að kortleggja undirlag jökla. Hún er ein gerðin af radar. Öll tækin eru þó aðlöguð að hverju verkefni fyrir sig. Þannig væri ekki hægt að beita íssjánni til þess að sjá inn í steypu, svo dæmi sé tekið.
Síðastliðið haust voru nokkur þessara tækja prófuð hér á landi, nánar tiltekið á brúnni yfir Sogið í Grímsnesi. Ekki var um viðamikla rannsókn að ræða, aðeins verið að kanna það á íslenskri steinsteypu. Niðurstöðurnar voru mjög áhugaverðar, og verða þær ásamt þessum aðferðum kynntar
Efni á Steinsteypudegi 2001
1. Áhrif jarðskjálfta á steinsteyptar byggingar
Dr. Ragnar Sigbjörnsson prófessor við HÍ
Í erindinu fjallaði Ragnar fyrst og fremst um jarðskjálftana á Suðurlandi í sumarið 2000, mælingar, kannanir á skemmdum (á steinsteyptum og hlöðnum húsum), greiningu áraunar, tengsl mældrar hreyfingar og skemmda, og reynadi síðan að draga einhverjar ályktanir sem að gagni gætu komið í hönnun.
2. Staðbundin jarðskjálftáhrif við Þjórsárbrú
Bjarni Bessason, verkfræðingur hjá Verkfræðistofnun
Jarðlagakönnun við Þjórsárbrú hefur leitt í ljós að austanmegin við ána er grágrýtismyndun en að vestanverðu er hraunlag sem hvílir á sjávar- og árseti. Í Suðurlandsjarðskjálftunum í júní árið 2000 mældist mikill munur á yfirborðshreyfingum á austur- og vesturbakka árinnar. Þessi munur hefur mikla þýðingu þegar hönnunarforsendur eru skilgreindar fyrir nýja Þjórsárbrú og á öðrum stöðum þar sem aðstæður eru svipaðar. Í fyrirlestrinum var fjallað um jarðskjálftamælingarnar við Þjórsárbrúna.
3. Raki í steypu hefðbundinna útveggja
Rögnvaldur S. Gíslason, efnaverkfræðingur hjá Rb
Greint var frá helstu niðurstöðum mælinga á borkjarnasýnum úr steypu fjölda útveggja húsa, sem einangruð eru að innan og liggja víðs vegar á höfuðborgarsvæðinu. Sýnin voru tekin á miðjum vetri úr veggjum, sem á voru mjög mismunandi en vel þekkt kerfi yfirborðsefna að utan. Ýmislegt í niðurstöðunum reyndist vera allfrábrugðið því sem gera má ráð fyrir að flestir hefðu talið að vænta mætti.
4. Betri hljóðvist í fjölbýlishúsum. Nýjar kröfur og praktísk atriði
Steindór Guðmundsson, verkfræðingur hjá Rb
Haustið 1997 voru kynnt drög að nýjum staðli um flokkun á (nýju) íbúðarhúsnæði eftir hljóðvist í þrjá flokka A,B og C.
Við endurskoðun byggingarreglugerðar 1998 voru sett inn leiðbeiningargildi innan sviga um auknar kröfur til hljóðeinangrunar, sem samsvara hljóðvistarflokki C.
Þessar auknu kröfur um hljóðvist kalla á nýjar og breyttar byggingaraðferðir í fjölbýlishúsum. Rb hefur undanfarin ár unnið að rannsóknaverkefnum á þessu sviði í samvinnu við nokkur byggingarfyrirtæki og framleiðendur einangrunarefna. Annars vegar hefur verið skoðað hvað þurfi að gera varðandi hefðbundnar byggingaraðferðir til þess að uppfylla kröfur um flokk C. Hins vegar hafa menn viljað prófa sig áfram í áttina að flokki B. Kynnar voru niðurstöður varðandi hljóðeiginleika varmaeinangrunar með múrhúð innan á útveggjum. Einnig voru kynntar niðurstöður varðandi steypt "fljótandi" hljóðdeyfigólf.
5. Menntun, endurmenntun og kröfur til steypumanna í Noregi
Þorvaldur Nóason, verkfræðingur hjá T.Noason AS
Framleiðsla og medhöndlun ferskrar steypu og aðhlynning við hörðnun hefur mikla þýðingu fyrir líftíma hennar. Gerð var stuttlega grein fyrir því hvernig norski steinsteypuiðnaðurinn tók í sameiningu á þessum málum, með því að auka þekkingu stéttarinnar á steypu. Skýrt var frá hvernig menntun og endurmenntun steypumanna er kerfislega byggð upp í Noregi.
6. Fiber Reinforced Concrete - Testing and Design - State of the Art
Henrik Stang, prófessor við Danmarks Tekniske Universitet
Lack of consistent testing and design guidelines has for a long time been an obstacle for application of fiber reinforced concrete on an industrial scale. A number of international efforts are currently being made in order to provide the basis for such guidelines. The lecture describes the basic approach taken and gives an overview of proposals for testing and design methods currently being made within the research community and within the framework of RILEM.
7. Inngangur að flotfræði
Dr. Ólafur Wallevik verkfræðingur hjá Rb
Flotfræði (rheology) er fræðigreinin um formbreytingu efna undir álagi. Notkun hennar í steinsteyputækni fer sívaxandi í heiminum og segja má að Íslendingar séu í fremstu röð í notkun hennar. Íslenskt hugvit hefur verið notað til að þróa seigjumæli sem seldur hefur verið víðsvegar um heim, allt frá Kína til Bandaríkjanna.
Seigjumælir mælir m.a. flotskerspennu ferskrar steinsteypu í stað sigmáls sem er frekar ónákvæm mæling ásamt plastísks seigjustuðuls sem ekki er hægt að mæla á annan máta. Seigjumælir er mikilvægt tæki í þróun sérsteypu, sem dæmi má nefna hástyrkleika- og sjálfútleggjandi steinsteypu. Rb hefur haldið flotfræðinámskeið (Dr. Wallevik rheology course) í samtals 7 löndum. Hugvitið hefur einnig leitt til þess að Rb hefur verið í fararbroddi varðandi rannsóknir á eiginleikum íblöndunarefna fyrir steinsteypu og haft stór verkefni fyrir stærstu framleiðendur heims, SKW Trosberg, (eigendur Masterbuilders) í Þýskalandi og GRACE í Bandaríkjunum..
8. Vélunninn sandur - úttekt
Dr. Børge Johannes Wigum
Gerð hefur verið úttekt á vinnslu á sandi (0-4 mm) sem er unninn úr föstu bergi (unninn sandur) til að hægt sé að þróa aðferðir á Íslandi til að hefja tilraunavinnslu sem síðan gæti leitt til framleiðslu. Kannað hefur verið hvernig unninn sandur hentar til framleiðslu á hefðbundinni og sjálfútleggjandi steypu, og hver markaðurinn fyrir slíkan sand er hérlendis. Líklegt er að gæði steypunnar aukist, en erlendar rannsóknar hafa m.a. sýnt að dæling er auðveldari og yfirborð verður sléttara.
9. Rýrnunarvarar til varnar sprungu-myndunar í steinsteypu
Guðni Jónsson, verkfræðingur hjá Rb
Rýrnunarvarar eru efni sem komið hafa fram á allra síðustu árum. Þessi efni draga úr sprungumyndun með því að minnka rýrnun til muna, allt að 50%. Um er að ræða yfirborðsvirk lífræn efnasambönd. Virkni þeirra byggist á því að minnka yfirborðsspennur í póruvatninu og á þann hátt dregur úr undirþrýstingi í pórum steypunnar.
Á Rannsóknarstofnun byggingariðnaðarins var í gangi verkefni þar sem þessi efni voru prófuð í múr og steinsteypu. Auk þess sem rýrnun var mæld voru áhrif rýrnunarvara á þjálni, þrýstiþol, beygjutogþol og frostþol rannsökuð.
10. Flugstöð Leifs Eiríkssonar-1. hluti stækkunar
Óskar Valdemarsson forstjóri Framkvæmdasýslu ríkisins
Á síðasta ári var tekin upp sú nýbreytni að fjalla ítarlega um valið mannvirki og einskorða sig þá ekki við steypuþáttinn. Að þessu sinni var fjallað um aðdraganda og forsendur stækkunar á FLE, verkefnisstjórnun, burðarvirki og skipulag byggingarinnar og ráðstafanir vegna þátttöku Íslands í Schengensamkomulaginu.